Хилийн албаны сургуулийн Хилийн боомтын аюулгүй байдал, шалган нэвтрүүлэх албаны тэнхимийн “Шалган нэвтрүүлэх үйл ажиллагаа” бакалаврын сургалтын хөтөлбөрийн ахиц дэвшлийн тайланд чанарын үнэлгээ хийж, дүгнэлт гаргах зорилгоор Боловсролын магадлан итгэмжлэх үндэсний зөвлөлийн захирлын тушаалаар томилогдсон шинжээчдийн баг Дотоод хэргийн их сургуулийн Хилийн албаны сургуульд ажиллалаа.

Шинжээчдийн баг сургалтын орчин нөхцөл, хөтөлбөрийн хэрэгжилт, өмнөх магадлан итгэмжлэлийн үеэр өгсөн зөвлөмж, шаардлагын биелэлттэй танилцаж, ахиц дэвшлийн тайланд тусгагдсан арга хэмжээ, холбогдох нотлох баримтуудад хянан магадлагаа хийв. Мөн хөтөлбөрийн цаашдын хэрэгжилт, чанарын сайжруулалтын чиглэлээр арга зүйн зөвлөгөө өглөө.

Шинжээчдийн багийн бүрэлдэхүүнд БМИҮЗ-ийн мэргэшлийн үндэсний шаталсан бүтэц, чанарын баталгаажуулалт хариуцсан мэргэжилтэн Ч.Пүрэвээ, Үндэсний батлан хамгаалахын их сургуулийн дэд профессор, доктор Б.Баярмөнх нар ажиллав.

Хөтөлбөрийн магадлан итгэмжлэл нь сургалтын чанар, агуулга, сургалтын орчин, багшлах боловсон хүчин, төгсөгчдийн ур чадвар, хөдөлмөрийн зах зээлийн хэрэгцээ шаардлагад нийцэж буй эсэхийг үнэлдэг. Энэ нь боловсролын байгууллагын чанарын баталгаажуулалт, сургалтын хөтөлбөрийн тасралтгүй хөгжлийг дэмжих чухал ач холбогдолтой юм.