Дотоод хэргийн их сургуулийн харьяа Ерөнхий боловсролын ахлах сургуулийн 2025-2026 оны хичээлийн жилд төгсөгчдийн “Эрдмийн баяр-2026” ёслолын үйл ажиллагаа өнөөдөр /2026.05.22/ Их сургуулийн жагсаалын талбайд боллоо. Энэхүү үйл ажиллагаанд Дотоод хэргийн их сургуулийн удирдлагууд болон төгсөх ангийн сурагчид, тэдний асран хамгаалагчдын төлөөлөл оролцов.

Энэ хичээлийн жилд тус сургуулийг 100 гаруй сурагч төгсөж байгаагаас дөрөв нь ОХУ, БНСУ-ын их, дээд сургуульд 100 хувийн тэтгэлэгтэй суралцах эрх авсан байна.

Тус сургуулийн 12А ангийн сурагч Б.Болор, 12Б ангийн сурагч Ч.Энх-Амгалан, 12В ангийн сурагч У.Нүрзэд нар сурлага, урлаг, спорт, нийгмийн идэвх оролцоогоороо бусдыгаа манлайлан “Шилдэг төгсөгч”-өөр тодорчээ. Мөн сурлага, спортын өндөр амжилт гаргасан 12а ангийн суралцагч Э.Оюунтунгалаг, 12б ангийн суралцагч Н.Молом, 12в ангийн суралцагч Э.Сүхбаатар нарыг захирлын нэрэмжит “Онцлох төгсөгч”-өөр шагналаар шагналаа.

Түүнчлэн 12А ангийн суралцагч Ё.Түшиг сагсан бөмбөгийн спортын мастер, 12А ангийн суралцагч Б.Ариунсайхан бүжгийн спортын дэд мастер, долоон сурагч сагсан бөмбөг, волейбол, даамны спортын нэгдүгээр зэрэг тус тус хүртсэн байна.

Ахлах сургуулиа амжилттай төгссөн нийт сурагчдадаа халуун баяр хүргэж, цаашдын эрдэм номын үйлсэд нь өндөр амжилт хүсье.