✅ Дотоод хэргийн их сургуулийн Хууль зүйн сургуулийн “ТӨГСӨЛТИЙН БАЯР”-ын ёслол хүндэтгэлийн ажиллагаа өнөөдөр /2026.05.08/ Их сургуулийн Соёлын төвд боллоо. Энэ үеэр “Эрх зүй” бакалаврын хөтөлбөрийн 100 гаруй төгсөгч бакалаврын зэргийн диплом, энгэрийн тэмдгээ гардан авав.

✅ Дотоод хэргийн их сургууль нь “Эрх зүй” хөтөлбөрөөр 1995 оноос хойш тасралтгүй сургалт явуулж байгаа билээ. Энэ жилийн хувьд бүрэлдэхүүн сургуулийн нэр “Хууль зүйн сургууль” болж өөрчлөгдсөний дараах анхны төгсөлт болж байгаагаараа онцлогтой. Мөн 2025 онд бакалаврын хөтөлбөрөө Монгол Улсад хууль зүйн их, дээд сургуулиудаас анх удаа ХБНГУ-ын “ACQUIN” олон улсын чанарын баталгаажуулалтын байгууллагаар амжилттай магадлан итгэмжлүүлсэн нь боловсролын чанар, өрсөлдөх чадварыг олон улсын түвшинд баталгаажуулсан чухал үйл явдал болсон юм.

✅ Түүнчлэн Хууль зүй, дотоод хэргийн яамны харьяа агентлагуудтай байгуулсан хамтын ажиллагааны хүрээнд Гаалийн ерөнхий газар, Улсын бүртгэлийн ерөнхий газар, Архивын ерөнхий газартай хамтран мэргэшүүлэх сургалт, дадлагыг бодит ажлын орчинд зохион байгуулдаг нь төгсөгчдийг шууд ажлын байранд ажиллах ур чадвартай болгодог давуу талтай. Өнөөдрийн байдлаар төгсөгчдийн 90 орчим хувь нь шүүх, хууль сахиулах байгууллага, төрийн захиргаа болон хувийн хэвшилд амжилттай ажиллаж байна.

✅ Төрөлх сургуулийнхаа түүхийн хуудсанд мөрөө үлдээж, сурлага, судалгааны ажил, урлаг, спортын амжилтаараа бусдыгаа манлайлан амжилттай суралцаж ”А” буюу 3.8-с дээш голч дүнтэй төгссөн 17 төгсөгчийг “Онцлох диплом”, 39 төгсөгчийг магистрын сургалтад элсэлтийн шалгалтгүйгээр суралцах “Эрхийн бичиг”-ээр, 15 төгсөгчийг Дотоод хэргийн их сургуулийн “Эрдэм” алтан медалиар, 4 төгсөгчийг “Авьяас” алтан медалиар, 2 төгсөгчийг “Тэргүүний тамирчин” алтан медалиар тус тус шагнаж урамшууллаа.

✅ Их сургуулиа төгсөж, эгэлгүй их хүсэл мөрөөдлийнхөө зүгт эрдмийн жигүүрээ дэлгэн нисэж буй төгсөгчдөө төлөөлөн 242 дугаар дамжааны төгсөгч Б.Отгонтуяа үг хэлж, эрдэмтэн багш нартаа талархлал илэрхийлэв.

✅ Эрхэм төгсөгчдийнхөө цаашдын амьдралд нь аз жаргал, ажил үйлсэд нь өндөр амжилт хүсье.