✅ Дотоод хэргийн их сургуулийн “Хүндэт профессор”, хууль зүйн шинжлэх ухааны доктор, профессор Жигжидсүрэнгийн Болдбаатар Монгол Улсын Ерөнхийлөгчийн зарлигаар “Монгол Улсын Шинжлэх Ухааны Гавьяат Зүтгэлтэн” цол тэмдгээр шагнууллаа.

✅ Шинжлэх ухааны доктор, профессор Ж.Болдбаатар нь улсад 42 жил, төрийн тусгай алба болон хуулийн байгууллагын боловсон хүчин бэлтгэх үйлсэд 30 жил хүчин зүтгэх хугацаандаа Дотоод хэргийн их сургууль, Орхон их сургууль болон хууль зүйн бусад их, дээд сургуульд Гүйцэтгэх ажил, Криминалистикийн техник зүй, Криминалистикийн тактик зүй, Эрүүгийн эрх зүй, Гэмт хэрэг зүйлчлэлийн онол, Нотолгооны онол, Эрүүгийн процессын эрх зүй, Криминологи, Хууль зүйн сэтгэц судлал зэрэг хичээлийг онолын өндөр түвшинд зааж иржээ.

✅ Монгол Улсын Шинжлэх Ухааны Гавьяат Зүтгэлтэн Ж.Болдбаатар нь 1993 онд Япон улсад “Монгол Улсын эрх зүйн тогтолцооны онцлог” сэдвээр хууль зүйн магистрын зэрэг, 2003 онд Монгол Улсад “Мансууруулах болон сэтгэцэд нөлөөлөх бодисыг борлуулах гэмт хэргийг нотлох ажиллагаа” сэдвээр хууль зүйн докторын (Ph.D) зэрэг, 2013 онд “Гэмт хэрэг илрүүлэхэд полиграф ашиглах онол, арга зүйн асуудал” сэдвээр хууль зүйн шинжлэх ухааны докторын (Sc.D) зэрэг тус тус хамгаалсан.

✅ Мөн багшлахын зэрэгцээ эрдэм шинжилгээний бүтээл туурвих ажилд ихээхэн санаачилга гаргаж, Гүйцэтгэх ажил, Эрүүгийн эрх зүй, Эрүүгийн байцаан шийтгэх эрх зүй, Криминалистик, Криминологийн чиглэлээр 30 гаруй ном, сурах бичиг, гарын авлага, нэг сэдэвт бүтээл, олон арван эрдэм шинжилгээний илтгэл, өгүүлэл бичиж, нийтийн хүртээл болгожээ. Мөн тэрээр хууль, бодлогын баримт бичиг, эрх зүйн актын төсөл боловсруулах ажлын хэсэгт байнга орж ажиллаж иржээ.

✅ “Монгол Улсын Шинжлэх Ухааны Гавьяат Зүтгэлтэн” хэмээх эрхэм хүндтэй цол хүртсэн Ж.Болдбаатар багшдаа Их сургуулийн Эрдмийн хамт олны зүгээс халуун баяр хүргэж, ажлын амжилт хүсэн ерөөе!